U përkujtua Kadri Rexhepi, “heroi i heshtur” i çështjes kombëtare

“Në dukje i thjeshtë dhe i heshtur, Kadriu ishte shumë këmbëngulës dhe i zëshëm sa herë që e kërkonte çështja e kombit”

Në njëmujorin e vdekjes së veprimtarit të çështjes kombëtare, Kadri Rexhepit, të dielën u  mbajt një tubim përkujtimor në Grenchen të Solothurnit në organizim të Shoqatës “Pranvera ‘81”. Në tubimin që e udhëhoqi veprimtari Xhevat Zeka, ishte i pranishëm edhe Ministër – Këshilltari në Ambasadën e Republikës së Kosovës, Mustafë Xhemaili. Ai, në emër të ambasadës dhe të ambasadorit, Naim Malaj, Kadri Rexhepin e vlerësoi si “hero të heshtur të çështjes kombëtare shqiptare”. 

Me një fjalë rasti publikut iu drejtua edhe bashkëveprimtarja e Kadri Rexhepit, Saime Isufi, e cila veç tjerash tha se Kadriu ka qenë i brumosur me ide patriotike që nga mosha e re si pjesëmarrës i demonstratave te vitit 1968 për Flamur Kombëtar në Tetovë. Pastaj me rreziqe të mëdha ai kishte gjetur mundësi ta vizitonte në burg simbolin e rezistencës kombëtare, Adem Demaçin, të cilin e kishte idhull dhe mësues gjatë gjithë jetës së tij”. 

Njëri nga njerëzit më të afërt të Kadri Rexhepit, udhëheqësi i lëvizjes ilegale të viteve 80-90, Hasan Malaj, evokoi kujtime të shumta për të ndjerin: “Kadriu ishte me të vërtetë njeri i fjalës dhe i veprimit. Ai kurrë nuk ka ditur të vonohet në takime apo në kryerjen e detyrave qe i kanë ngarkuar shokët”, tha Malaj.

“Ai kurrë nuk ka ditur të thotë jam lodhur apo nuk kam mundësi, por gjithnjë ka qenë në ballë të organizimeve kudo që e ka kërkuar çështja kombëtare. Ai nuk dallonte subjekte apo treva”, u shpreh për Kadriun edhe shoku i tij i ngushtë nga Kërçova, Rexhep Bajrami.

Ndërsa gazetari dhe veprimtari, Ismet Rashiti, në emër të Shoqatës “Pranvera ‘81” evokoi kujtime duke nxjerrë në pah disa nga  karakteristikat që e dallonin figurën e Kadriut. “Ai në dukje ishte i thjeshtë, modest dhe i heshtur, por në të vërtetë ishte shumë këmbëngulës, parimor dhe i zëshëm sa herë që e kërkonte çështja e madhe kombëtare. Kadriu me vendosmëri dhe në mënyre parimore e mbronte të kaluarën e ndritur, por kjo nuk e pengonte të ecte përpara me kohën, që të realizoheshin kërkesat e popullit shqiptar”, tha mes tjerash bashkëveprimtari i tij shumëvjeçar, Ismet Rashiti.

Ndërsa sipas veprimtarit dhe publicistit Ibish Neziri, “Kadriu la gjurmë të pashlyeshme edhe në formimin dhe zgjerimin e klubeve shqiptare. Roli dhe kontributi i tij në këtë drejtim ishte tepër i madh dhe i pazëvendësueshëm”.

Me një poezi kushtuar Kadri Rexhepi, u paraqit edhe veprimtari, Shefket Musliu, i cili njëherësh e çmoi lart kontributin e Kadriut dhënë UÇPMB-së.

Në fund të pranishmit, në emrin e familjes i përshëndetën dhe falënderuan, nipi Sefer Jahiu i ardhur enkas nga Presheva dhe djali Rahman Rexhepi.