Vaksina kundër plakjes? Studiuesit japonezë thonë se po bëjnë hapa në këtë drejtim

Po sikur të mund të jetonim përgjithmonë? Është një pyetje e cila prej shekujsh mundon njerëzimin.

Studiuesit në Japoni thonë se mund të kenë bërë një hap drejt rritjes së jetëgjatësisë njerëzore. Ata shprehen se kanë testuar me sukses një vaksinë kundër qelizave që kontribuojnë në procesin e plakjes.

Çfarë është plakja qelizore? Qelizat bëhen të vjetra kur ndalojnë së dyfishuari vetveten, shpesh si përgjigje ndaj dëmtimit natyror të ADN-së së tyre.

Mendohet se plakja qelizore kontribuon në vetë procesin e plakjes, si dhe në sëmundjet e lidhura me plakjen si Alzheimer dhe disa lloje kanceri.

“Qelizat e plakura sekretojnë një sërë faktorësh që prishin funksionin e indeve,” tha për Euronews Next Dr. Salvador Macip, kreu i Laboratorit të Mekanizmave të Kancerit dhe Plakjes në Universitetin e Leicester.

“Procesi biologjik i plakjes është shumë kompleks, prandaj nuk ka gjasa që një strategji e vetme ta ndalojë plotësisht ose ta kthejë atë. Megjithatë, ka ndoshta shumë mënyra për ta ngadalësuar  dhe pastrimi i qelizave të plakura duket të jetë një nga më të lehtat dhe potencialisht më efektive”, theksoi eksperti.

Por, para se të emocionoheni, ia vlen të keni parasysh se studiuesit ende nuk e dinë se sa mund të zgjatet jetëgjatësia e një krijese të gjallë.

LAJME INTERESANTE NGA INTERNETI