‘Omicron’ rrezikon kolapsin e sistemeve shëndetësore

(KEYSTONE/Anthony Anex)

Rritja e rasteve me Covid-19 po vazhdon me shpejtësi në disa vende të botës, duke shënuar një rekord të ri javor të rasteve të reja.

“Cunami” i rasteve të reja si rezultat i kombinimit të varianteve Delta dhe Omicron rrezikon të çojë sistemet shëndetësore në prag të kolapsit, deklaroi drejtori i përgjithshëm i Organizatës Botërore të Shëndetësisë,Tedros Adhanom Ghebreyesus, gjatë një konference për shtyp.

“Kjo situatë do të vazhdojë të ushtrojë një presion të madh mbi stafin shëndetësor, tashmë të rraskapitur”, tha shefi i OBSH-së.

“Rreziku global i lidhur me variantin e ri Omicron mbetet shumë i lartë”, njoftoi sot Organizata Botërore e Shëndetësisë (OBSH).

“Studimet e fundit kanë treguar se Omicron në krahasim me variantin Delta, rritet me një kapacitet më të lartë, duke u dyfishuar brenda dy ose tre ditëve”, shtoi organizata, duke vënë në dukje se ka pasur një rritje të shpejtë të incidencës së rasteve me Covid-19 në disa vende, transmeton Ansa, përcjell Albinfo.ch.

Mbi 935,000 raste me Covid-19 janë regjistruar çdo ditë gjatë javëve të fundit në mbarë botën, duke shënuar nivelin më të lartë të arritur ndonjëherë që prej fillimit të pandemisë.

Të dhënat i referohen javës nga 22 deri më 28 dhjetor dhe bazohen në raportet e komunikuara çdo ditë nga autoritetet shëndetësore të çdo vendi.