Vendimi për Ramush Haradinajn shtyhet më 6 prill

Gjykata në Colmar të Francës ka shtyrë sërish për 6 prill, vendimin për ish-kryeministrin e Kosovës, Ramush Haradinajn.

(AP Photo/Jean-Francois Badias)

Gjykatë franceze në Colmar të Francës ka shtyrë për 6 prill, vendimin për lirimin ose ekstradimin në Serbi të ish-kryeministrit të Kosovës, Ramush Haradinaj. Ky vendim është marrë në seancën e të enjtes derisa Ramush Haradinaj e ka cilësuar si gjykim politik.

“Gjykata ka kërkuar informata shtesë nga ana serbe. Jam peng politik. Lufta ’98-’99 është filtruar në Gjykatën e Hagës, luftë tjetër nuk ka ndodhur.”, ka thënë Haradinaj duke e quajtur këtë shtyrje si abuzim nga kjo gjykatë, raportojnë mediat kosovare nga Colmari.

Ish-kryeministri i Kosovës dhe ish komandanti më në zë i UÇK-së, u ndalua nga autoritetet franceze më 4 janar në bazë të një urdhër-arresti të lëshuar nga Serbia përmes INTERPOL-it.