Volejboll: Zvicra mundi Shqipërinë

Kombëtarja shqiptare e femrave në volejboll është mundur 3-0 nga Zvicra, në ndeshjen e vlefshme për eliminatoret e Kampionatit Evropian, sfidë e luajtur në sallën sportive “Feti Borova” në Tiranë.

Kjo është humbja e katërt e Shqipërisë në këtë event, në katër ndeshje të luajtura deri më tani, ndaj vajzat kuqezi mbyllin renditjen e Grupit B, ende në kuotën e 0 pikëve.

Edhe pse Shqipëria bëri një ndeshje të mirë, duke rivalizuar në shumicën e kohës, fitorja ende nuk po vjen për kombëtaren tonë në këtë event, përcjell albinfo.ch.

Siç raporton Telesport nga Tirana, të tri setet janë të ngjashme mes tyre, me Shqipërinë që rivalizon deri në pikët e fundit, por vajzat kuqezi gabojnë atëherë kur nuk duhet. Në ndonjë rast loja është me hope dhe kjo ndikon në rezultatin final, ndërkohë që edhe përvoja jo shumë e madhe e këtij grupi të ri vajzash bën që Shqipëria të çalojë në fund.

Gjithsesi, Shqipëria tregoi një lojë në rritje nga ndeshja e fundit, ndërkohë që dy sfidat e fundit të eliminatoreve, ndaj Austrisë e Kroacisë, do të luhen në janar të 2019-ës.

Shqipëri – Zvicër, 0-3 (19-25, 22-25, 10-25)