VV-ja kërkon Interpelancë për Astrit Deharin, nuk përjashton protestat

“Ne nuk do të ndalim kërkimin e drejtësisë dhe trysnisë ndaj institucioneve për hetim të pavarur”, ka thënë Kurti

Lëvizja Vetëvendosje ka paralajmëruar se do ta ftojë në interpelancë kryeministrin e Kosovës, Ramush Haradinaj, për rastin e vdekjes së aktivistit të tyre, Astrit Dehari, duke mos përjashtuar edhe protesta.

Në një konferencë për media, kryetari i VV-së ka thënë se Kadri Veseli nuk e ka sqaruar asnjëherë deklaratën e tij “kujdes po e vrani veten”, që e kishte dhënë vetëm disa ditë para se Astrit Dehari të humbte jetën.

“Ne nuk do të ndalim kërkimin e drejtësisë dhe trysnisë ndaj institucioneve për hetim të pavarur”, ka thënë Kurti.

Këto deklarata janë bërë në tremujorin e një afati që VV-ja kishte dhënë në protestën e tyre të 5 nëntorit para Qeverisë së Kosovës. Pos hetimit të pavarur, kishin kërkuar edhe dorëheqjen e zyrtarëve shtetërorë, të përfshirë në hetimin për vdekjen e Deharit.

Prokuroria e Shtetit ka konfirmuar për KTV-në muajin e kaluar se është lejuar që ekspertiza për vdekjen e Deharit të bëhet në Qendrën Universitare të Mjekësisë Ligjore në Lausanne të Zvicrës.