WhatsApp teston abonimin e ri “WhatsApp Plus”

Keystone

Kompania Meta po teston një shërbim të ri me pagesë për WhatsApp, i quajtur “WhatsApp Plus”. Lajmi është raportuar fillimisht nga WABetaInfo, ndërsa disa detaje janë konfirmuar edhe nga Qendra e Ndihmës së Meta-s.

Ky abonim i ri fokusohet kryesisht te personalizimi i aplikacionit. Përdoruesit që paguajnë do të kenë mundësi të përdorin afishe (stickers) premium me efekte speciale, të ndryshojnë temat dhe ikonat e aplikacionit, si dhe të vendosin zile të personalizuara për kontakte të veçanta. Gjithashtu, do të mund të fiksojnë deri në 20 biseda dhe të kenë kontroll më të avancuar mbi njoftimet dhe tingujt.

Pavarësisht këtyre shtesave, funksionet kryesore të WhatsApp-it si mesazhet, thirrjet zanore dhe video, si dhe enkriptimi nga fillimi në fund, do të mbeten falas.

Sipas raportimeve, çmimi i abonimit pritet të ndryshojë sipas vendeve, duke filluar nga më pak se 1 euro deri rreth 2.50 euro. Meta po shqyrton gjithashtu mundësinë e një periudhe prove falas për një muaj.

Për momentin, WhatsApp Plus është ende në fazë testimi dhe mund të shtohen veçori të reja në të ardhmen.