Widmer-Schlumpf bën thirrje për një OKB “të fortë, moderne dhe efikase”

Presidentja e Konfederatës, Eveline Widmer-Schlumpf, ka thënë të martën para Asamblesë së Përgjithshme të OKB-së në Nju-Jork se është për një OKB “të fortë, moderne dhe efikase”. Ajo përmendi situatën në Siri, reformën e Këshillit të Sigurimit si dhe 10-vjetorin e hyrjes së Zvicrës në OKB.

Eveline Widmer-Schlumpf ishte e shtatëmbëdhjeta shefe shtetërore e cila foli zyrtarisht para Kuvendit të OKB-së të martën pasdite. Në kuadër të 10-vjetorit të hyrjes së Zvicrës në OKB, ajo kujtoi se “OKB-ja dhe Zvicra ndajnë të njëjtat vlera dhe ndjekin qëllimet e përbashkëta”.

Ajo përmendi gjithashtu “promovimin e paqes dhe sigurisë, zhvillimin e qëndrueshëm, mbrojtjen dhe promovimin e të drejtave të njeriut si dhe ndihmën emergjente për viktimat e konfliktit dhe fatkeqësitë natyrore”.

“Vetoja duhet të jetë e kufizuar”

Për çështjet me konflikte OKB-ja duhet të arrijë “të kapërcejë pengesat dhe të propozojë zgjidhje. Përdorimi i të drejtës së vetos në Këshillin e Sigurimit vështirë justifikohet në rastet e gjenocidit, krimit të luftës ose krimeve kundër njerëzimit”, tha ajo.

“Kjo është arsyeja pse Zvicra, së bashku me vendet e tjera, vazhdon të kërkojë një reformë të metodave të punës të Këshillit të Sigurimit. Transparenca dhe bashkëpunimi i fundit me organe të tjera të OKB-së duhet të përmirësohet dhe vetoja duhet të jetë e kufizuar”, ka theksuar Presidentja e Konfederatës.

Në emër të Zvicrës ajo kërkoi që situata në Siri të sillet para Gjykatës Ndërkombëtare Penale. “Zvicra kërkon që autorët e shkeljeve të rënda të të drejtave të njeriut të përgjigjen për veprimet e tyre. Mosndëshkimi për këta autorë nuk është vetëm imoral. Ai gjithashtu dëmton procesin e pajtimit që angazhohet në një shoqëri pas një lufte dhe favorizon përsëritjen e ngjarjeve”, shpjegoi zonja Eveline Widmer-Schlumpf .

Ndërkaq, shefja e konfederatës rikujtoi se Zvicra drejton një grup prej rreth tridhjetë shteteve, të cilat kërkojnë që Gjykata Ndërkombëtare Penale të trajtojë rastin e Sirisë.