Zbritet epërsia e PDK-së, Skenderaj dhe Drenasi dyshohen për manipulim votash

Në Drenas dhe Skënderaj ka prova të qëndrueshme për manipulim dhe të dhënat e këtyre dy zonave janë lënë jashtë përllogaritjeve

Rrjeti i organizatave joqeveritare, Demokracia në Veprim, publikoi rezultatet paraprake ku sipas vëzhguesve të saj, janë numëruar më shumë se 51 për qind e fletëve të votimit.

Përfaqësues të Demokracisë në Veprim në deklaratën për mediat në orët e pasmesnatës thanë se në Drenas dhe Skënderaj ka prova të qëndrueshme për manipulim dhe se të dhënat e këtyre dy zonave janë lënë jashtë përllogaritjeve të tyre pikërisht për këtë fakt.

Sipas llogarive paraprake të vëzhguesve të Demokracisë në Veprim (pas numërimit të 51 të fletëvotimeve pa Drenasin e Skenderjat) të transmetuara nga koha.net, PDK vazhdon të udhëheqë me 30.69 për qind, LDK 26.2 për qind, Vetëvendosje 12.78 për qind, AAK 10.89 përqind, AKR 7.85 për qind, LDD 2.78 për qind FER 2.35 përqind dhe partitë e tjerat rreth 6 për qind.

Demokracia në Veprim tha se manipulimi është mbështetur në votimin e të njëjtit person mbi 2 herë. Ky manipulim, thanë ata, ka dëmtuar procesin zgjedhor dhe mbetet për t’u parë në orët në vazhdim nëse procesi zgjedhor duhet të përsëritet në këto dy zona apo jo.