Zgjedhjet lokale: Të mërkurën nis regjistrimi i diasporës, ҫka duhet të dini?

Foto: KQZ

Nga e mërkura, më 23 korrik, Komisioni Qendror i Zgjedhjeve (KQZ) do të hapë afatin për regjistrimin e votuesve jashtë Kosovës që dëshirojnë të votojnë përmes postës në zgjedhjet lokale të 12 tetorit 2025.

Afati për regjistrim do të zgjasë për 38 ditë dhe do të përfundojë më 29 gusht 2025.

Zëdhënësi i KQZ-së, Valmir Elezi, shpjegoi se regjistrimi mund të bëhet në dy mënyra: përmes platformës elektronike të KQZ-së ose përmes postës, duke e dërguar aplikacionin në kutinë postare të KQZ-së në Kosovë, transmeton albinfo.ch.

“Duke filluar nga data 23 korrik, në përmbushje të detyrimit ligjor, KQZ do të aktivizojë platformën elektronike, përmes së cilës votuesit jashtë Kosovës mund të regjistrohen për votim”, tha Elezi.

Ai shtoi se, ndryshe nga zgjedhjet për Kuvendin e Kosovës, në zgjedhjet lokale nuk do të mundësohet votimi nëpër përfaqësi diplomatike të Kosovës.

“Në zgjedhje lokale, sipas Ligjit për Zgjedhjet e Përgjithshme, votuesit jashtë Kosovës mund të votojnë vetëm përmes postës. Ky ligj specifikon qartë se votimi në përfaqësi diplomatike nuk aplikohet në këto lloj zgjedhjesh”, sqaroi Elezi.

Pwr dallim nga herwt e tjera, nw kwto zgjedhje, diaspora do tw pranojw me postw fletwvotimet qw do tw ua dwrgojw KQZ-ja, ndërkohë që mbetet obligim i votuesve të regjistruar që pas votimit të kthejnë prapa pakot me fletëvotime brenda periudhës 17 shtator deri më 11 tetor në adresë të kutisë postare të KQZ-së, qoftë në Kosovë apo në kutitë postare të KQZ-së që do të hapen nëpër vende të ndryshme të botës.

Votimi për shtetasit e Kosovës jashtë vendit do të zhvillohet nga data 17 shtator deri më 11 tetor 2025. Të drejtë për të votuar me postë do të kenë vetëm ata që do të regjistrohen si votues jashtë Kosovës brenda afatit të caktuar, transmeton albinfo.ch.