Lajme

Zvicerani do të bëhet deputet me votat e shqiptarëve dhe të huajve tjerë

Në një pllakat të shkruar në një gjuhë korrekte shqipe, me fotografinë e tij dhe të stolisur me flamuj kombëtarë shqiptarë dhe të shtetit të Kosovës, Fischer kërkon votën e shqiptarëve

Reto Fischer, një politikan pa parti nga Buchs-i i Aargaut është duke kandiduar për Parlamentin e Kantonit të tij, në zgjedhjet që mbahen në tetor. Dhe, për të shtuar gjasat për një vend në parlament, ai nuk heziton të kërkojë ndihmën e qytetarëve me prejardhje të huaj, shkruan albinfo.ch. Veç të tjerëve, ai përmes facebook-ut u është drejtuar me një thirrje për mbështetje edhe shqiptarëve.

Në një pllakat të shkruar në një gjuhë (deri diku) korrekte shqipe, me fotografinë e tij dhe të stolisur me flamuj kombëtarë shqiptarë dhe të shtetit të Kosovës, Fischer kërkon votën e shqiptarëve.

Ai, dorën në zemër, me një pllakat të ngjashëm u është drejtuar edhe qytetarëve me prejardhje nga vendet e ish Jugosllavisë, duke prezantuar flamurët e tyre përkatës së bashku…

Për ta merituar votën e qytetarëve me prejardhje të huaj, ai përkujton faktin se si politikan pa parti prej kohësh angazhohet për të drejtat dhe integrimin e të huajve.

Dhe, në këtë drejtim Reto Fischer, nuk është emër i panjohur për opinionin në Kantonin e tij, Aargau dhe më gjerë dhe për të kishte shkruar edhe albinfo.ch.

Ai në vitin 2017, pasi kishte fituar dy vende në asamblenë e komunës Buchs, i kishte ofruar njërin prej dy vendeve një të reje me prejardhje turke, e cila, pas shumë peripecive sapo kishte marrë pasaportën zvicerane.

Shansi që një person të fitojë dy vende në asamble është i rrallë por i mundshëm, shkruante albinfo.ch në vitin 2017. Kjo ka ndodhur te Fischer-i falë faktit se ai ka kandiduar “në krye” të një liste, të përbërë vetëm nga ai.

Sidoqoftë, shkresa me të cilën Fischer i drejtohet elektoratit me prejardhje shqiptare është si më poshtë:

Miq të dashur

Në kantonin Aargau në tetor do të ketë zgjedhje! Në këto zgjedhje unë jam kandidat i pavarur për Këshillin e Madh. Si i pa parti, unë do të garoj me listën time 10. Temat për të cilat jam i përkushtuar janë, kultura, integrimi, sporti dhe rinia. Unë do të angazhohem për njerëzit që jetojnë në kantonin Aargau, por që mjerisht nuk kanë të drejtë vote! Nëse Ti ke të drejtë e vote, atëherê i gezohem votës tënde, por edhe nëse ende nuk ke pasaportë Zvicrane, atëherë do t’më vinte mirë nëse rrethit tënd i tregon dhe i flet për kandidaturën time. Faleminderit shumë për mbështejen tuaj! Shihemi së shpejti

Reto Fischer Lista 10 !