Ukraina

Zvicra do të ndërpresë ndihmat sociale për refugjatët ukrainas që kanë pasuri

Ashtu si me personat e pranuar përkohësisht nga vendet e tjera, tani, në llogaritje përfshihen asetet ekzistuese të tyre, në Ukrainë dhe në Zvicër

Deri më tani, rreth 60,000 njerëz të ikur nga Ukraina kanë ardhur në Zvicër, ku u është dhënë statusi i mbrojtjes S, transmeton albinfo.ch. Ky status supozon kthimin e tyre në atdhe, sapo të përfundojë lufta.

Për këtë arsye, konferenca e SODK-së e drejtorëve social kantonal pati vendosur rregulla të veçanta për ta sa i përket marrjes së ndihmës sociale për gjashtë muajt e parë pas shpërthimit të luftës.

Tani e tutje do të merren parasysh pasuritë që kanë refugjatët ukrainas

Në rastin e njerëzve nga Ukraina, asetet si bizhuteritë, makinat, por edhe pasuritë bankare apo pasuritë e paluajtshme në vendin e tyre nuk merreshin parasysh kur vendosej e drejta e tyre për ndihmë sociale.

Kjo është në kontrast me refugjatët e pranuar përkohësisht nga vendet e tjera, shkruan srf.ch. Kështu, deri më tani, edhe refugjatët e pasur nga Ukraina kanë pasur të drejtë të marrin ndihmë sociale.

Kjo, sigurisht  ka çuar në pakënaqësi në rritje, shpjegon Sekretarja e Përgjithshme e SODK-së, Gaby Szöllösy: “Ne vumë re se kishte një numër të caktuar të kritikave publike për trajtimin e ndryshëm të të refugjatëve nga Ukraina, transmeton albinfo.ch. Kjo është arsyeja pse Bordi ynë i Drejtorëve diskutoi opsione të ndryshme se si duhet të marrim parasysh në të ardhmen të ardhurat dhe pasuritë e njerëzve që kanë nevojë për mbrojtje (personave me status S)”.

Si hap i parë, bordi i SODK-së tani ka vendosur të shtrëngojë kriteret për marrjen e ndihmës sociale, sa i përket tërheqjes së parave nga Ukraina.

Rregulli i ri është: “Nëse personat me status S tërheqin fonde nga llogaritë bankare ose asete të tjera në Ukrainë, këto duhet të llogariten në të ardhurat e tyre këtu”.

Përjashtimi i vetëm: makina

Po ashtu, edhe pasuritë më të mëdha të tyre që gjenden në Zvicër, duhet të llogariten përsëri. Kjo rrit ndjeshëm pengesën për marrjen e ndihmës sociale nga refugjatët e pasur.

Një përjashtim, megjithatë, duhet të mbetet për momentin: makina, transmeton albinfo.ch. “Makina u shërben ukrainasve në rrugën e tyre në shtëpi kur duan të kthehen. Nuk është e volitshme nëse tani i detyrojmë ta shesin këtë makinë”, thotë Szöllösy.

Megjithatë, kjo vlen vetëm deri në fund të vitit. Rekomandimet e reja se si të veprohet me automjetet dhe asetet e tjera si bizhuteritë pritet të jenë të disponueshme në fund të vjeshtës.


LAJME INTERESANTE NGA INTERNETI