Zvicra me “parajsë të re tatimore” për kompanitë

Luzerni ia merr kryesimin Zugut si kantoni më i lirë për taksat e bizneseve në vitin 2026

Zvicra vazhdon të mbetet një nga vendet më atraktive në Evropë për kompanitë, falë taksave të ulëta. Sipas një krahasimi të ri tatimor nga kompania PwC, kantoni i Luzernit është bërë vendi më i lirë për biznes në Zvicër për vitin 2026, përcjell albinfo.ch.

Luzerni ka ulur normën e tatimit për kompanitë në 11.66%, duke kaluar kantonin e Zugut, i cili tani qëndron në 11.71%. Edhe pse diferenca është e vogël, ndryshimi e vendos Luzernin në krye të listës së kantoneve më konkurruese në Zvicër.

Në total, tetë kantone kanë ulur taksat për bizneset, përfshirë Cyrihun, Aargau, Schwyz dhe Basel-Landschaft. Ndërkohë, katër kantone i kanë rritur lehtë normat tatimore, mes tyre Basel-Stadt, Schaffhausen, Solothurn dhe Jura.

Në anën tjetër, kantoni i Bernës mbetet më i shtrenjti në Zvicër për kompanitë, me një normë prej 20.54%, pothuajse dyfish më e lartë se në Luzern. Edhe Cyrihu vazhdon të jetë në grupin e kantoneve me taksa më të larta, pavarësisht një uljeje të lehtë në 19.47%.

Ky zhvillim e forcon edhe më shumë konkurrencën tatimore brenda Zvicrës, duke e bërë vendin një prej destinacioneve më tërheqëse në Evropë për investime dhe kompani ndërkombëtare./Albinfo.ch

---