Zvicra ndërpret riatdhesimin e azilkërkuesve në Afganistan

Afganistani, në fillim të korrikut i kishte kërkuar Zvicrës që të shtyjë riatdhesimin e azilkërkuesve të refuzuar për tre muaj

Zvicra po pezullon kthimet në Afganistan “deri në një njoftim tjetër për shkak të situatës së ndryshuar në vend”.

Kjo është bërë e ditur sot nga Sekretariati Shtetëror për Migracionin (SEM).

Gjithashtu nuk do të ketë vendime të reja për dëbim. Përgatitjet për riatdhesim do të vazhdojnë vetëm në rastet e personave delikuentë.

Qeveria e Afganistanit, që në fillim të korrikut i kishte kërkuar Zvicrës që të shtyjë riatdhesimin e azilkërkuesve të refuzuar për tre muaj për shkak të përparimit të talebanëve dhe për shkak të pandemisë korona. Por, Berna kishte vazhduar me kthimet e detyruara në vendin e shkatërruar nga lufta, shkruan srf.ch.

Organizatat humanitare kishin kohë që bënin thirrje që Zvicra të ndalonte kthimin në Afganistan, transmeton albinfo.ch. Kështu ka vepruar edhe Ndihma Zvicerane për Refugjatët (SFH) përsëri të mërkurën pasi Gjermania dhe Holanda kishin hequr dorë nga kthimet.

Situata në Afganistan është përkeqësuar
Situata e sigurisë në Afganistan është përkeqësuar në mënyrë dramatike që nga vendimi për të tërhequr trupat ndërkombëtare nga vendi në mes të prillit.

Talibanët fondamentalistë islamikë tani kanë rimarrë kontrollin e nëntë kryeqyteteve provinciale.

---