Zvicra ndihmon Maqedoninë me 5.4 milionë franga

Ministria për vetëqeverisje lokale në Maqedoni dhe Ambasada Zvicerane në Shkup sot kanë prezantuar projektin “Zhvillimi rajonal i qëndrueshëm dhe gjithëpërfshirës” në shumë prej 5.4 milionë franga zvicerane që do të financohet nga Qeveria Zvicerane.

Sipas ministrit Suhejl Fazliu, paratë janë në dispozicion deri në vitin 2020, shkruajnë mediat shqiptare të Maqedonisë, përcjell albinfo.ch.

“Si segment veçanërisht i rëndësishëm i projektit, do të theksojë mbështetjen me mbi 2.5 milionë franga zvicerane për përgatitjen e projekteve në disa fusha të rëndësishme, si: nxitja dhe zhvillimi i turizmit, mjedisit hapësinor, infrastruktura e biznesit dhe përfshirja sociale. Kryesisht fjala është për projekte të infrastrukturës që mund të prodhojnë efekte të rëndësishme si dhe përgatitjen e dokumentacionit teknik për projekte të mëdha rajonale të cilat mund të aplikohen në fonde të tjera”, është shprehur Suhejl Fazliu, ministër i Vetëqeverisjes lokale.

Zvicra gjithmonë ka qenë mbështetëse e Maqedonisë, duke e përkrahur në shumë projekte.

“Jemi të vetëdijshëm se duhen ndërmarrë shumë masa që të përmirësohet efikasiteti i politikave në zhvillimin rajonal. Është e domosdoshme të ndahen mjete buxhetore sipas nivelit të zhvillimit planor të rajoneve, transparencë më të lartë dhe pjesëmarrje të qytetarëve në planifikimin dhe realizimin e zhvillimit rajonal”, u shpreh Sybille Suter Tejada, ambasadore e Zvicrës.