Zvicra pagoi shtrenjtë vaksinën e Moderna-s dhe e liroi kompaninë nga çdo përgjegjësi ligjore

Kontratat e publikuara pas një beteje gjashtëvjeçare tregojnë se Zvicra pagoi deri në 40 dollarë për dozë dhe pranoi t’i mbulojë edhe shpenzimet ligjore të kompanisë

Pas një mosmarrëveshjeje gjyqësore që zgjati gjashtë vjet, revista zvicerane “Beobachter” ka arritur të detyrojë autoritetet të publikojnë plotësisht kontratat e Zvicrës me kompaninë farmaceutike Moderna për furnizimin me vaksina kundër Covid-19. Dokumentet e publikuara hedhin dritë mbi kushtet e marrëveshjes, të cilat tregojnë se Zvicra jo vetëm që ka paguar çmim të lartë për vaksinat, por gjithashtu e ka liruar Modernën nga çdo përgjegjësi ligjore, përcjell albinfo.ch. 

Sipas kontratave, Zvicra kishte siguruar në verën e vitit 2020 një furnizim “prioritar” prej 4.5 milionë dozash, por për këtë kishte pranuar kushte të ashpra. Qeveria zvicerane i ka paguar Modernës nga 32 deri në 35 dollarë për dozë, ndërsa për vaksinat e përgatitura në shiringa të gatshme çmimi ka arritur deri në 40 dollarë për dozë.

Edhe pse krahasimi me shtete të tjera është i vështirë për shkak se çmimet nuk janë publikuar në të gjitha vendet, raportohet se disa shtete evropiane i kanë blerë vaksinat më lirë, ndërsa Shtetet e Bashkuara kanë paguar rreth gjysmën e këtij çmimi.

Dokumentet zbulojnë gjithashtu se Moderna i ka diktuar Zvicrës kushte të gjera, përfshirë garanci për “imunitet ligjor nga çdo përgjegjësi” për Modernën dhe kompanitë e lidhura me të në zinxhirin e furnizimit, për çdo pasojë që mund të lidhej me vaksinën.

Në kontratë thuhet se Zvicra merr përsipër të mbulojë çdo kosto, pretendim apo përgjegjësi që mund të lindë ndaj Modernës, përfshirë edhe rastet që mund të lidhen me studime klinike shtesë, nëse ato do të kërkoheshin nga autoriteti zviceran i barnave, Swissmedic.

Për më tepër, kontratat tregojnë se Zyra Federale e Shëndetit Publik (BAG) kishte pranuar të mbrojë Modernën nga çdo dëm financiar, gjoba, pretendime, shpenzime dhe pasoja ligjore, duke përfshirë edhe shpenzimet e avokatëve.

Sipas marrëveshjes, në rast të një procesi gjyqësor apo hetimi, Zvicra do të duhej të mbulonte edhe kostot për mbrojtjen ligjore të Modernës, çka ka nxitur reagime dhe debat në opinionin publik pas publikimit të dokumenteve./Albinfo.ch 

---