Zvicra përgjysmon qarkullimin e trenave, në luftë kundër koronavirusit

Trenat që qarkullojnë në distanca të gjata, nga e enjtja gradualisht do të lëvizin në intervale prej një ore (tani qarkullojnë për çdo gjysmë ore)

©Keystone

Këshilli Federal në kuadër të masave të gjendjes së emergjencës, të shpallura pasditen e sotme, ka vendosur që të zvogëlohet i gjithë transporti publik në Zvicër. Megjithatë, shërbimet themelore vazhdojnë të garantohen, kanë bërë të ditur ministrat kompetentë në konferencën për media që mbajtën pak orë më parë në Bernë, shkruan albinfo.ch

Por, sipas qeverisë, anulimet dhe vonesat mund të priten vetëm nga e enjtja.

Në këtë drejtim, do të preken të gjitha nivelet dhe segmentet e transportit: transporti në distanca të gjata, transporti rajonal dhe ai urban. Trenat që qarkullojnë në distanca të gjata, nga e enjtja gradualisht do të lëvizin në intervale prej një ore (tani qarkullojnë për çdo gjysmë ore).

Ndërsa prej të enjtes e tutje, trenat rajonalë do të qarkullojnë në çdo gjysmë ore, ndërsa deri më sot ata kanë qarkulluar një herë në çdo çerek ore. Ajo që duhet theksuar në veçanti: Trafiku ndërkufitar përfundon në kufij. Kjo tregon se linjat ndërkombëtare janë ndërprerë.

Të gjithë ata që përdorin transportin publik  për udhëtimet e tyre, duhet të kontrollojnë orarin online para çdo udhëtimi, këshillojnë kompanitë e transportit.