Bota

Zvicra reagon kundër dënimit me kamxhik në Arabinë Saudite

Aktivisti arab raif Badawi, për “fyerje të islamit” është dënuar me 1000 goditje me kamxhik, të ndara në 20 pjesë

Këshilli Federal i Zvicrës reagon ashpër kundër dënimit me rrahje me kamxhik në Arabinë Saudite. Qeveria zvicerane i referohet konkretisht zbatimit të dënimit të një aktivisti saudit për të drejtat e njeriut me 50 goditje me kërbaç. Ai në të vërtetë, për “fyerje të islamit” është dënuar me 1000 goditje me kamxhik, të ndara në 20 pjesë. Sot, e premte, ka qenë radha e zbatimit të serisë së dytë të kamxhikosjes, gjegjësisht 50 goditjet. Seria e parë ka qenë të premten e kaluar.

Badawi, siç quhet i dënuari, mbahet në burg nga viti 2012

Arabia Saudite duhet të ndërpresë një dënim të tillë dhe ta rishqyrtojë edhe njëherë rastin, thuhet më tutje në kërkesën e Qeverisë së Zvicrës. Një dënim i tillë shkel, veç tjerash edhe Konventën kundër Torturës, të ratifikuar edhe nga Arabia Saudite.

Para Zvicrës, dënimin me goditje me kamxhik para publikut e ka dënuar si të papranueshëm edhe Bashkimi Evropian.