Rita Ora: “Vdes për gjellërat që i përgatit nëna ime”

“Si shqiptare e lindur në Kosovë, unë “vdes” për ushqimet e nënës sime. Ajo i bën shumë të shijshme sidomos pastat dhe ushqimet tjera tradicionale”, ka thënë Rita

Rita Ora vazhdon të pushtojë ballinat e revistave të njohura në botë. Këngëtarja më e famshme shqiptare në arenën ndërkombëtare kësaj radhe ka pozuar dhe ka dhënë intervistë për edicionin më të ri të revistës së njohur gjermane “Joy” . Revista gjermane e përshkruan këngëtaren prishtinase si këngëtare me shumë stil dhe para se gjithash shumë simpatike.

“Rita Ora më këngën e saj të re “Body On Me”, jo vetëm që ka zënë vendin e parë në katër shtete, por ajo ka treguar sukses edhe si aktore, pastaj anëtare në jurinë e “The Voice” si dhe është imazh i markës së njohur të veshjeve “Adidas”, shkruan revista, përcjell “albinfo.ch”.

Për revistën “Joy”, talentja e njohur flet për stilin e saj të veshjes dhe nga kush frymëzohet. Ajo ka thënë se sa herë që nuk është në disponim, e shikon Pharrell Williams dhe gjen tek ai diçka të mirë. “Nëse unë kam një ditë jo të mirë, e shikoj një foto të tij dhe mendoj: Më duhet një kapele e tillë, një xhaketë dhe një palë xhinse të ngjashme si të tij. Kaq”, është shprehur Rita.

Më tej 25 vjeçarja shqiptare ka thënë se që e vogël i ka pëlqyer të eksperimentojë me stilin e veshjes së saj. “Shumë njerëz e marrin jetën shumë seriozisht. Unë e marr shumë thjeshtë dhe me disponim. Ndihem mirë edhe kur eksperimentoj me veshje”, njofton “albinfo.ch”.

Por veshja nuk është e vetmja pikë e dobët e saj. Ajo ka thënë se nuk arrin t’u rezistojë as ushqimeve sidomos atyre që i përgatit nëna e saj. “Si shqiptare e lindur në Kosovë, unë “vdes” për ushqimet e nënës sime. Ajo i bën shumë të shijshme sidomos pastat dhe ushqimet tjera tradicionale”, ka thënë Rita.