Prindërit nga Maqedonia e harrojnë vajzën në autostradën gjermane

Një autobus nga Maqedonia, i cili po udhëtonte në drejtim të Gjermanisë, të dielën ka harruar pa qëllim një vajzë në pushimoren e autostradës në Fuchsberg

Një vajzë nga Maqedonia ka përjetuar të dielën pasdite një tmerr të madh. Vajza ishte duke udhëtuar me një autobus në autostradën A8, në drejtim të Shtutgartit. Autobusi i stërmbushur me udhëtarë është ndalur për një pushim të shkurtër në parkimin e autostradës në Fuchsberg. Pas pushimit, udhëtarët kanë hipur sërish në autobus dhe vazhdojnë udhëtimin. Pasi që janë nisur, është vënë re që vajza e vogël, e cila udhëtonte bashkë më prindërit e saj, nuk ishte në autobus.
Vajza, e cila kishte mbetur në tokë, ishte e tronditur se si autobusi ishte nisur pa të. Një vozitës 35-vjeçar, i cili kaloi me veturën e tij nëpër autostradë, pasi që e sheh vajzën duke vrapuar pas autobusit, ndalet dhe e merr në përkujdesje deri sa të vijë policia, shkruan merkur.de, transmeton albinfo.ch.
Pas arritjes së policisë, në vendngjarje, kishte arritur edhe autobusi nga Maqedonia, kështu që prindërit përsëri e përqafuan vajzën e tyre. Pak pasi ishte nisur autobusi, prindërit e kishin vërejtur se vajza nuk gjendej me ta në autobus. Vozitësi i autobusit ishte kthyer menjëherë në daljen e parë të autostradës për në pushimore.
Familja nga Maqedonia e kishte falënderuar policinë gjermane, e posaçërisht vozitësin 35-vjeçar, i cili ishte përkujdesur për bijën e tyre, përcjell albinfo.ch. Ky i fundit ishte shokuar nga ngjarja, pasi shumica e pjesëmarrësve në komunikacion e kishin injoruar vajzën, edhe pse e kishin parë duke vrapuar me lot në sy pas autobusit.