Politikanët, mesazhe urimi për Kelmendin

Ndër të parët që reagoi ishte kryeministri i Kosovës, Isa Mustafa. “Majlinda Kelmendi ngriti lartë simbolet shtetërore të Republikës së Kosovës në Rusi, duke i dhënë vendit tonë një sukses të jashtëzakonshëm..."

Politikanët kosovarë kanë uruar Majlinda Kelmendin për medaljen e fituar në Rusi. Ata kanë uruar në mënyra të ndryshme, derisa të gjithë janë shprehur krenarë, shkruan albinfo.ch.

Ndër të parët që reagoi ishte kryeministri i Kosovës, Isa Mustafa. “Majlinda Kelmendi ngriti lartë simbolet shtetërore të Republikës së Kosovës në Rusi, duke i dhënë vendit tonë një sukses të jashtëzakonshëm. Sot Majlinda u shpall Kampion i Evropës duke fituar medalje të artë, në Kazan të Rusisë dhe Nora Gjakova fitoi medalje të bronztë, kurse mbrëmë Sigal Prishtina u bë Kampion i Ballkanit në Basketboll. Me këtë ritëm të sukseseve në sport dhe lëmenjtë tjerë të jetës, ky vit mund të hyjë në histori për rezultate kulmore”, ka shkruar Mustafa në “Facebook”.

I lumtur dukej edhe presidenti Hashim Thaçi. “Majlinda e fitoi të artën edhe në Evropianin e xhudos në Kazan. Urime edhe Norës për suksesin. Shenja premtuese në prag të debutimit të shtetit tonë në Lojërat Olimpike në Rio”, ka thënë Thaçi.

Ish-presidentja e Kosovës, Atifete Jahjaga, ka shprehur gëzimin e saj për suksesin e Majlinda Kelmendit në Kampionatin Evropian të xhudos që u mbajt në Rusi. “Majlinda!! Si secilën herë tjetër, edhe sot na bëre krenarë”, ka shkruar ajo në “Facebook”.