Xhaka paralajmëron largimin

“Kam nisur karrierën kundër Darmstadit. Më pas pata katër vjet të mrekullueshëm këtu. Dhe tani ndoshta kam luajtur ndeshjen e fundit për Gladbachun pikërisht ndaj Darmstadtit”, u shpreh Xhaka

Granit Xhaka i ka ditët e numëruara në Gjermani. Tashmë edhe vet lojtari ka paralajmëruar se do të largohet, madje edhe para Kampionatit Evropian “Francë 2016”, shkruan albinfo.ch.

Kujtojmë që mediat angleze janë të bindura se Xhaka ka arritur marrëveshje me Arsenalin. “Do të ketë bisedime të rregullta tani dhe një vendim do të merret para nisjes së ‘Euro 2016’”, u shpreh Xhaka për “Bild”, duke shtuar: “Kam nisur karrierën në Borussia në Kupën e Gjermanisë ndaj Darmstadit. Më pas pata katër vjet të mrekullueshëm këtu. Dhe tani ndoshta kam luajtur ndeshjen e fundit për Gladbachun pikërisht ndaj Darmstadtit”, theksoi Xhaka.

Ndërkohë, klubi gjerman ka konfirmuar ofertën zyrtare përmes uebfaqes së klubit, ndërsa tani ka thënë se pritet marrëveshja mes klubeve. “Drejtori sportiv Max Eberl ka konfirmuar se ka një ofertë për mesfushorin zviceran. Një marrëveshje mes klubeve pritet të bëhet së shpejti”, ka njoftuar klubi.