Opozita prapë kundër Pacollit nëse rikandidohet

Presidenti i Kosovës, Behgjet Pacolli, i cili mbrëmë ka ardhur nga Zvicra, pas vendimit të Gjykatën Kushtetuese, e cila konstatoi me shumicë votash se gjatë zgjedhjes së tij president është shkelur Kushtetuta, ka anuluar të gjitha aktivitetet për sot dhe ditëve në vijim.

Ndërkohë partitë opozitare, të cilat e kanë dërguar në Gjykatën Kushtetuese çështjen e zgjedhjes së Pacollit president, e kanë mirëpritur vendimin e këtij institucioni, që iu përgjigj pozitivisht ankesës së LDK-së dhe AAK për zgjedhjen e presidentit në seancën e Kuvendit më 22 shkurt.

Deputetja e LDK-së, Vjosa Osmani ka thënë se vendimi i Gjykatës Kushtetuese tregon se argumentet të cilat në këtë gjykatë kanë qenë të qëndrueshme. Sipas saj, LDK-ja ende nuk ka marrë vendim nëse do të merrte pesë në ndonjë seancë në Kuvend nëse Pacolli rikandidohet për president.

Vendimin e Gjykatës Kushtetuese e ka përshëndetur edhe nga AAK-ja. Shefi i Grupit Parlamentar të kësaj partie, Ardian Gjini, e ka vlerësuar të drejtë vendimin e gjykatës, ngase në momentin kur e ka nënshkruar peticionin, AAK-ja, sipas tij, ka besuar se zgjedhja nuk ishte konfrom Kushtetutës. Sipas Gjinit, AAK-ja nuk do të ndryshojë qëndrimin e saj nëse Pacolli do të rikandidohet për të marrë postin e presidentit. Gjini ka thënë se vendimi i Gjykatës Kushtetuese ka treguar se Kosova nuk ka pasur president dhe çdo vendim që është marr gjatë kohës sa Pacolli ishte president duhet të shfuqizohet.

Në seancës e sotme, Kryesia e Kuvendit nuk ka diskutuar për rastin presidentit Behgjet Pacolli, ngase ende nuk është njoftuar zyrtarisht me shkrim nga ana e Gjykatës Kushtetuese.

Por, nënkryetari i Kuvendit, Xhavit Haliti ka thënë se vendimi i Gjykatës Kushtetuese duhet të respektuar nga secili person ndaj të cilit kjo gjykatë merr vendim. Haliti ka thënë se para pak kohe Kosova kap pasur një praktikë të tillë, ku presidenti ka dhënë dorëheqje pas vendimit të Gjykatës Kushtetuese, dhe nëse Pacolli nuk e bënë një gjë të tillë, atëherë Kuvendi duhet të merr veprime konkrete.

Ndërkohë, pas mbledhjes së Kryesisë së Kuvendit, para mediave nuk deshi të prononcohet shefi i Grupit Parlamentar të AKR-së, Ibrahim Makolli.

Edhe Zyra e Presidencës dhe vetë presidenti Pacolli ende nuk janë prononcuar për media, me arsyetim se ende nuk kanë marr vendimin me shkrim nga Gjykata Kushtetuese.