Shqipëria përshëndet bisedimet Prishtinë – Beograd

Kryeministri i Shqipërisë dhe Zëvendëskryeministrja e Kosovës pohuan se këto bisedime janë teknike dhe nuk kanë të bëjnë me sovranitetin territorial të Kosovës

Kryeministri i Shqipërisë, Sali Berisha ka pritur në një takim zyrtarë në Tiranë, Zëvendëskryeministren e Kosovës dhe njëkohësisht kryetare e delegacionit që merr pjesë në bisedimet mes Republikës së Kosovës dhe Serbisë, Edita Tahirin.

Kryeministri Berisha shprehu vlerësimin e tij për paraqitjen shumë të mirë  të delegacionit të Kosovës, në këto bisedime, të cilat  do të sjellin një kontribut të rëndësishëm në jetën e përditshme të qytetarëve të dy vendeve, por edhe në forcimin e bashkëpunimit midis këtyre dy vendeve dhe atij rajonal.

Zëvendëskryeministrja e Kosovës, Edita Tahiri theksoi edhe një herë se këto janë bisedime teknike që kanë të bëjnë me çështje të jetesës së përditshme së qytetarëve të këtyre dy vendeve,të pavarura e sovrane, përkatësisht Republikës së Kosovës dhe Serbisë dhe nuk bëhet fjalë, në asnjë rast, për çështje që kanë të bëjnë me sovranitetin apo ndryshim të kufijve.

Të dy personalitetet shprehën konsideratat e tyre pë Shtetet e Bashkuara të Amerikës dhe për Bashkimin Europian, si dhe u vlerësua fakti se Kosova është jo vetëm një ndër vendet më të sigurta –  me treguesit ndër më të ulët të kriminalitetit në rajon dhe në Evropë, por është shndërruar në një faktor të rëndësishëm paqeje, stabiliteti, sigurie dhe promovimi të bashkëpunimit dhe të miqësisë në rajon.

Në fund, kryetarja e delegacionit të Kosovës vlerësoi kontributin e vazhdueshëm të Kryeministrit Sali Berisha, sa i përket njohjes ndërkombëtare të Kosovës, por edhe për sa i përket konsolidimit të vendit dhe rolit të saj, si në forumet e bashkëpunimit rajonal, ashtu edhe në aspiratat  e Republikës së Kosovës për integrimin euroatlantik.