Wathelet dëshiron t’i kthejë sa më shpejt kosovarët

Sipas Agjencisë telegrafike belge “Belga”, ministri i Brendshëm kosovar do ta vizitojë Brukselin më 12 maj të këtij viti për të nënshkruar një marrëveshje për riatdhesimin e kosovarëve nga rajoni i Benelux-it. Kjo është një deklaratë e sekretarit shtetëror belg për politikë të migrimit dhe azilit, Melchior Wathelet, të lëshuar gjatë së martës.

Në deklaratën për të përditshmet belge “La Libre” dhe “De Morgen” ai ka thënë se dëshiron që sa më shpejt t’i kthejë kosovarët të cilët arrijnë në Belgjikë.

Wathelet ka nënvizuar se numri i kërkesave të parashtruara për strehim është në rritje e sipër. Gjatë muajit mars, janë regjistruar 2.193 raste të reja, ndërsa ai ka potencuar se Kosova është vendi më i rëndësishëm për Belgjikën për sa u përket azilkërkuesve, para Afganistanit, Guinesë apo Irakut.

Në këtë mënyrë, sekretari shtetëror belg, kërkon të përshpejtojë shyrtimin e rasteve të azilkërkuesve kosovarë, duke garantuar një shqyrtim kualitativ të rasteve.