Vetëvendosje: Kosova para kolapsit ekonomik

Njoftimi për udhëtimin në Bullgari dëshmon qartë se qeveria në krye me Hashim Thaçin e kanë sjellë Kosovën para kolapsit ekonomik

Levizja Vetëvendosje vlerëson se Qeveria e Kosovës është zgjedhur në Kuvendin e Kosovës pa program qeveritar dhe në mungesë të qartë të një agjende ekonomike.

Ky konkludim i kësaj lëvizjeje ka dalë pas publikimit të lajmit se një pjesë e madhe e Qeverisë së Kosovës gjendet në një udhëtim zyrtar katërditorë në Qendrën e Skijimit “Bansko” në Bullgari. Sipas “Vetëvendosjes”, njoftimi për udhëtimin në Bullgari dëshmon qartë se qeveria në krye me Hashim Thaçin e kanë sjellë Kosovën para kolapsit ekonomik.

Gjithashtu, sipas “Vetëvendosjes”, vendimi që plani të hartohet në një qendër skijimi në Bullgari tregon se ndërtesat e shumta qeveritare në Prishtinë nuk i mjaftojnë Qeverisë së Kosovës për të hartuar planin ekonomik për shpëtimin e vendit.

Komunikata për media e “Vetëvendosjes” përfundon duke i quajtur përpjekjet e qeverisë si shterpe, për t’i hedhur hi syve qytetarëve të Kosovës.

Ndërkohë, Ambasadori amerikan në Kosovë, Christopher Dell, u bashkohet 6 ministrave të Qeverisë së Kosovës, të cilët po qëndrojnë në Bullgari, ku pritet të hartojnë planin e Qeverisë për zhvillim ekonomik të vendit. Bëhet e ditur se të mërkurën, këtij grupi do t’i bashkohet edhe kryeministri Hashim Thaçi.

Ministrat e Qeverisë së Kosovës kanë udhëtuar në Bullgari me ndihmën e Komisionit Evropian, Bankës Botërore dhe USAID-it, për t’i vendosur pikat kryesore të Planit të Punës së Qeverisë.