Stefanoviq: Në çdo takim arrihet përparim i caktuar

"Pala serbe ka paraqitur propozim me të cilin parashihet të rregullohet lëvizja e lirë, plotësisht në pajtim me standardet ndërkombëtare"

“Këta hapa janë vërtet të vegjël dhe nuk duhet të pritet që shpejt të arrihet zgjidhja, sado që ne për çdo temë kemi oferta konkrete, zgjidhje konkrete”, ka thënë shefi i delegacionit serb për bisedime me Prishtinën, Borisllav Stefanoviq.

Ai ka deklaruar pas kthimit nga dialogu i fundit në Bruksel se në çdo takim realizohet një përparim i caktuar, raporton Radio Beogradi. Stefanoviq ka shtuar se kështu ka qenë edhe në mbledhjen e fundit, ku kanë dominuar çështjet rreth lëvizjes së lirë.

Pala serbe ka paraqitur propozim detaj, me të cilin parashihet të rregullohet lëvizja e lirë, dhe i cili është plotësisht në pajtim me standardet ndërkombëtare, madje edhe para tyre, ka thënë Stefanoviq, duke shtuar se propozimet janë konkrete.