Oficeri “gay” i BND-së dënohet për shkelje sekreti në Kosovë

Përkthyesit të tij, shtetas i Maqedonisë me të cilin ishte në partneritet homoseksual, i kishte treguar të dhëna sekrete

Një ish epror i Shërbimit Federal Informativ të Gjermanisë (BND) i cili vite më parë ka shërbyer në Kosovë, është dënuar me kusht nga një gjykatë e Munihut, Gjermani.

Dënimi i tij, një vjet e dhjetë muaj me kusht, i është shqiptuar atij për mashtrim dhe shkelje të obligimit për mbajtje të sekreteve të punës. Me këtë vendim, gjykata e Munihut ka zbutur dënimin prej 2 vjet e tre muaj me kusht, që para një viti i ishte shqiptuar nga një gjykatë më e ulët, njofton bild.de.

Oficeri 44 vjeçar i BND-së ka bërë një jetë të dyfishtë gjatë qëndrimit në Kosovë. Ai fajësohet se përkthyesit të tij, një shtetas i Maqedonisë me të cilin ishte në lidhje partneriteti homoseksual, i kishte treguar të dhëna që përbëjnë shkelje të sekretit të shërbimit ku ka punuar.

Veç kësaj, ai i ka paguar pa të drejtë partnerit të tij gjatë viteve 2007-2008 rreth 14 mijë euro.

Përkthyesi, një 30 vjeçar i cili tashmë bashkëjeton hapur me ish oficerin, qe dënuar me kusht për 14 muaj.