KE ndau 25 milionë euro për Pallatin e Drejtësisë

Pallati i Drejtësisë është një parakusht për funksionim më të mirë të sistemit ligjor në Kosovë dhe përfaqëson identitetin e këtij sistemi

Komisioni Evropian (KE) ka ndarë 25 milionë euro për ndërtimin e Pallatit të Drejtësisë në Kosovës. Qeveria e Kosovës sot ka nënshkruar dy kontrata pune lidhur me ndërtimin e kompleksin të drejtësisë, i cil do të ndërtohet në lagjen Prishtina e Re, tre kilometra larg Prishtinës.

Kjartan Bjornson, shef i Operacioneve në Zyrës Ndërlidhëse të KE-së në Kosovë, ka thënë se projekti i financuar nga KE, ka për qëllim që të vë nën të njëjtën çati të gjitha institucionet e drejtësisë.

“KE ka premtuar mbi 25 milionë euro për realizimin e këtij projekti. Infrastruktura e re do të lejojë që institucionet kryesore të drejtësisë, duke përfshirë edhe ato që janë të shpërndara në të gjithë Prishtinën, të vendosen nën të njëjtën çati. Kjo do të përmirësojë sundimin e ligjit në aspektin cilësor dhe sasior, dhe në këtë mënyrë do të rrisë efikasitetin e sistemit të drejtësisë. KE ka kënaqësinë të ndihmojë në përpjekjet e Kosovës në rrugën e saj drejt integrimit evropian”, ka thënë Bjornson.

Ndërsa, zëvendëskryeministri Hajredin Kuçi ka thënë se, përveç ligjeve e gjykatësve të mirë, për një sundim ligji duhet edhe ambienti.

“Në këtë drejtim, Pallati i Drejtësisë është një parakusht për funksionim më të mirë të sistemit ligjor në Kosovë dhe përfaqëson identitetin dhe krenarinë e këtij sistemi, për këtë ne i jemi mirënjohës KE-së dhe presim të realizohen gjykime të drejta dhe do të ndërtohet një sistem i standardeve evropian, përmes së cilit kredibiliteti i ligjit dhe drejtësisë do të rritet”, ka thënë Kuçi.