Portieri shqiptar shndërrohet në kamerier në mbrëmjen bamirëse

Portieri kuqezi shërbeu ushqim në darkën e shtruar me qëllim mbledhjen e të ardhurave në ndihmë të popullsisë së goditur nga tërmeti në zonën e Amatriçes më 24 gusht

Portieri i Kombëtares shqiptare, Thomas Strakosha nuk shkëlqen vetëm në fushën e lojës, por edhe jashtë saj, shkruan albinfo.ch.

Futbollisti shqiptar hoqi uniformën e portierit dhe e veshi atë të kamerierit. Jo se 21-vjeçari po e shikon këtë si një punë të dytë, por bëhet fjalë për një veprimtari bamirësie.

Së bashku me Danilo Cataldin, Marco Parolon dhe Franjo Prcen, “gardiani” kuqezi shërbeu ushqim në darkën e shtruar me qëllim mbledhjen e të ardhurave në ndihmë të popullsisë së goditur nga tërmeti në zonën e Amatriçes më 24 gusht.

Strakosha javën e kaluar debutoi ndaj Milanit, derisa luajti edhe ndaj Empolit, pasi portieri Federico Marchetti është i lënduar. Strakosha pritet të ftohet edhe në Kombëtaren kuqezi.