Votohet detyrimi për ndërtimin e strehimoreve

Vetëm pak ditë para se të ndodhte katastrofa në Japoni, parlamenti kishte propozuar të hiqej obligimi për ndërtimin e strehimoreve

Sindromi “Fukushima”  ka gjetur shprehje edhe në ndërtimin e shtëpive në Zvicër. Parlamenti Nacional, i ndikuar nga pasojat shkatërruese të tërmetit dhe cunamit që ndodhi në Japoni në muajin mars, ka vendosur që të vendosë sërish si kriter për ndërtimin e shtëpive familjare edhe hapësirat për mbrojtje (strehimoret) në bodrumet e tyre.

Vetëm pak ditë para se të ndodhte katastrofa në Japoni, po ky parlament kishte propozuar të hiqej obligimi për ndërtimin e strehimoreve të tilla për privatët, shkruajnë mediet zvicerane. I hedhur në votim, propozimi në fjalë dje është përkrahur nga 94 deputetë ndërsa e kanë kundërshtuar 74 sish. Të vendosur për vënien e detyrimit për ndërtimin e strehimoreve ishin kryesisht deputetët e djathtë, ndërsa të majtët e konsideronin këtë detyrim si masë të vjetruar.

Më bindshëm ka votuar në favor të obligimit në fjalë dhoma e kantoneve javën e kaluar, me ç`rast pro kishin votuar 27 ndërsa kundër 12 deputetë.