Buhler takon krerët e feve

Gjenerali e vlerësoi takimin si historik dhe si rrugë drejt së ardhmes në të cilën të gjitha dallimet etnike dhe fetare do të tejkalohen

Udhëheqësit e tri bashkësive më të mëdha fetare në Kosovë, Myftiu Naim Tërnava nga komuniteti mysliman, Peshkopi i Rashkës dhe Prizrenit, Teodosije nga kisha ortodokse serbe si dhe Peshkopi Dodë Gjergji nga kisha katolike, janë takuar me komandantin e KFOR-it, gjeneralin Erhard Buhler.

Ata kanë biseduar për ruajtjen dhe përmirësimin e vlerave fetare, respektin e ndërsjellë të bashkësive fetare dhe kulturën e tolerancës dhe paqes.

Buhler ka shprehur kënaqësinë e tij për bisedimet të cilat pasqyrojnë frymën e pajtimit në shoqërinë e Kosovës.

Ndonëse joformal, gjenerali e vlerësoi takimin si historik dhe si rrugë drejt së ardhmes në të cilën të gjitha dallimet etnike dhe fetare do të tejkalohen.

Buhler shprehu besimin se edhe bisedimet e mëtejshme do të mund të aranzhohen. Kurse ofroi ndihmën e tij për ngjarje të tilla të rëndësishme të cilat janë në interes të KFOR-it dhe misionit të tij për paqe.