Krasniqi: Kush ka probleme me interpretimin le t’i drejtohet Gjykatës Kushtetuese

Kryeparlamentari, Jakup Krasniqi nuk ka heqë dorë nga përgjigjja që ia ka dhënë EULEX-it, për çështjen e imunitetit të deputetëve.

Krasniqi ka deklaruar se çështja e imunitetit të deputetëve është mirë e qartësuar me ligjet në fuqi dhe Kushtetutën.

Prandaj sipas tij, Kuvendi i Kosovës nuk do të nxjerrë Rezolutë për të kërkuar qartësim nga Gjykata Kushtetuese e Kosovës.

Ai ka theksuar se çështja e imunitetit është tepër e qartë dhe kushdo që ka paqartësi, këtë vetë mund ta kërkojë në Gjykatën Kushtetuese të Kosovës.

“Është e qartë. Deputeti është me imunitet 24 orë. Kush ka probleme me interpretimin le ti drejtohet Gjykatës Kushtetuese”, ka thënë Krasniqi.

Krasniqi ka vlerësuar ditë më parë se nuk është përgjegjësi e Kuvendit që të merret me çështjen e imunitetit.

Ai i ka sugjeruar EULEX-it që, bazuar në Kushtetutën e Kosovës, Qeveria vetë mund të kërkojë nga Gjykata Kushtetuese interpretim për imunitetin e deputetit.