Kosovës i duhen investime të huaja

Për t’i tërhequr investimet e huaja, duhet të funksionojë shteti ligjor, si dhe të krijohen mekanizma adekuatë për krijimin e kushteve të favorshme për investitorët, kushte këto që deri tani nuk janë krijuar, është thënë në një konferencë në Institutin “AAB- Riinvest”.

Përfaqësues të institucioneve vendëse dhe ndërkombëtare, si dhe ekspertë të çështjeve ekonomike, kanë deklaruar se Kosova ka kapacitete të mjaftueshme për investitorët e huaj.

Për këtë duhet që në Kosovë të ketë një demokraci dhe ekonomi të fortë, në mënyrë që Kosova të bëhet model stabiliteti në rajon.

Investimet e huaja në Kosovë gjatë kësaj dekade, e konkretisht, pas shpalljes së pavarësisë, janë konsideruar si një mjet i rëndësishëm për zhvillimin ekonomik dhe social të vendit.

Mirëpo, në raportet e organizatave vendëse dhe ndërkombëtare thuhet se në vitet e fundit, investimet e huaja kanë pësuar rënie të vazhdueshme.