Shqipëria, 1.1 miliard nga turizmi

Gjysmë miliardi euro nga turistët dhe vizitorët e huaj hynë në Shqipëri për qëllime biznesi vetëm në tremujorin e tretë të vitit. Këto të dhëna janë publikuar nga Banka e Shqipërisë në bilancin tremujor të pagesave, raportojnë mediat në Tiranë.

Sipas të dhënave, për periudhën korrik-shtator, që përbën dhe pikën e sezonit turistik, vizitorët e ardhur nga jashtë shpenzuan 521 milionë euro në Shqipëri, ose 25 për qind më shumë se e njëjta periudhë e vitit të kaluar.

Ndërsa për të gjithë 9 mujorin ekonomia ka përfituar nga shpenzimet e udhëtarëve që hyjnë nga vendet e tjera 1 miliard e 161 milionë euro, ose mbi 15 për qind më shumë se një vit më parë, përcjell albinfo.ch.

Ky është niveli më i lartë i të ardhurave që është regjistruar ndonjëherë nga udhëtimet, çka sinjalizon se gjatë këtij viti turizmi mund të jetë shndërruar në një nga sektorët kyç që ka udhëhequr rritjen ekonomike.

Një ditë më parë Instituti i Statistikave raportoi se pikërisht gjatë tremujorit të tretë të vitit ekonomia shtoi 18 mijë e 600 vende të reja pune.

Të dhënat e detajuara tregojnë se një pjesë e mirë e punësimeve të reja kanë ardhur nga sektori i shërbimeve, që është i lidhur ngushtë me turizmin.

Por, veç kontributit në rritjen ekonomike dhe punësim, shifrat e Bankës së Shqipërisë tregojnë se të ardhurat e gjeneruara nga turizmi ishin burimi kryesor që kompensuan deficitin e lartë tregtar të ekonomisë, si diferencë mes vlerës së importeve dhe asaj të eksporteve.