EULEX-i konfiskon një eskavator në Leshak

Eskavatori është përdorur për rrënimin e shtëpizave në pikën kufitare në Jarinje, por edhe për sulmin ndaj ushtarëve polakë të KFOR-it

EULEX-i ka konfiskuar një eskavator në Leshak që ishte përdorur nga serbët për djegien e pikës kufitare në Jarinje gjatë muajit të kaluar. 

Ky konfiskim është bërë në bazë të një urdhërese të prokurorisë së EULEX-it, që është duke u marrë me hetimet rreth sulmit në këtë pikë kufitare.

“Ky eskavator është përdorur për rrënimin e shtëpizave në pikën kufitare në Jarinje, por edhe për sulmin ndaj ushtarëve polakë të KFOR-it” , ka thënë për mediat serbe në veri zëdhënësi i KFOR-it Hans-Diter Vihter.

Ndërkohë  dhjetëra qytetarë serbë të Leposaviqit kanë dalë në rrugë afër Leshakut për të bllokuar ushtarët e KFOR-it të cilët po tentojnë të bllokojnë të gjitha rrugët që po shfrytëzohen për kontrabandimin e mallrave nga Serbia.

Kryetari paralel i komunës së Leposaviqit, Branko Niniq ka thënë se njësitë e KFOR-it po tentojnë të okupojnë hapësirat e Ndërmarrjes pyjore ‘Serbijashuma’ në Leshak.