Shqipëria ofroi mikpritjen e saj edhe në Panairin e Shtutgartit

E vendosur në hyrje, e madhe, me flamurin shqiptar në qendër dhe ekranet e mëdha që shfaqin pamje të pikave turistike, Shqipëria është vendi partner i këtij panairi

Panairi Ndërkombëtar i Turizmit i mbajtur në Shtutgart të Gjermanisë ofroi shumë për vizitorë, dhe u cilësia si shumë i suksesshëm, pasi numri i vizitorëve ishte i madh.

Në këtë Panair për herë të parë mori pjesë edhe Shqipëria, duke u përfaqësuar mjaft mirë.

“Borë, flamuj që valëviten, vizitorë që hyjnë e dalin, makina të vëna radhë në parkim, është vetëm pak nga panorama e Panairit Ndërkombëtar të Turizmit. Sfidë më vete është të lëvizësh brenda godinës së stërmadhe të panairit, ndaj pikave të informimit mund t’u drejtohesh shpesh”, shkruan “DW” në gjuhën shqipe, përcjell albinfo.ch.

Normalisht nuk mungon edhe vizita në stendën e Shqipërisë. E vendosur në hyrje, e madhe, me flamurin shqiptar në qendër dhe ekranet e mëdha që shfaqin pamje të pikave turistike, Shqipëria është vendi partner i këtij panairi.

Mirjana, vajza nga Puka, të jep buzëqeshjen e parë. “Jemi në hyrje se na ka hije mikpritja”, thotë ajo duke qeshur. Mirjana shfaq hapur habinë dhe gëzimin për interesin e treguar nga vizitorët. “Ndjehem aq mirë kur ju bashkohen valleve tona popullore apo pyesin për produktet shqiptare. Ka plot vizitorë qe rikthehen sërish për të marrë broshura të tjera”.  E rrotull nuk është e vështirë të dëshmosh që është përplot me vizitorë.

“Në stendën e Irlandës është improvizuar një Irish Pub me muzikë ‘live’, që ka mbledhur rreth e qark dashamirës të birrës. Aty takoj Ekianin nga Gjermania, teksa ndan një gotë me miqtë. Pasi merr vesh që vij nga Shqipëria thotë që e njeh përmes miqve si vendi i maleve të larta dhe çmimeve të ulëta. ‘Unë jam koleksionist monedhash dhe leku shqiptar më duket shumë interesant, i kam në koleksion të gjitha’”, thuhet në shkrimin e “DW”, duke përfunduar: Shtutgart, you did it!