Çdo i pesti në Zvicër ka simptoma alergjie

Çdo i pesti njeri në Zvicër ka simptoma alergjie nga lulet ose kafshët e shtëpisë që shkaktojnë reaksione alergjike. Rreth 5 deri 8 për qind e fëmijëve dhe të rriturve në Zvicër janë alergjikë

Keystone

Dita Kombëtare e Alergjisë do të shënohet më 23 mars 2017 dhe Qendra zvicerane për alergji ofron këshilla për polenin me rastin e kësaj dite. Çdo i pesti njeri në Zvicër ka simptoma alergjie nga lulet ose kafshët e shtëpisë që shkaktojnë reaksione alergjike.
Rreth 5 deri 8 për qind e fëmijëve dhe të rriturve në Zvicër janë alergjikë. Shumë prej tyre janë prekur në frymëmarrje.
Një nga arsyet kryesore për rritjen e alergjive gjatë dekadave të fundit është standardi i lartë i jetesës dhe higjienës. Sipas kësaj teorie, armiqtë “natyrorë” (parazitet, viruset, bakteret) gjithnjë mungojnë në sistemin imunitar.
Në ditët e sotme në të gjitha vendet e botës perëndimore preken rreth 25 persona në çdo 100 vetë. Por, nëse vazhdon kjo mënyrë e rritjes së numrit të të prekurve nga alergjia, pas 40 vjetësh çdo person do të jetë alergjik të paktën ndaj një substance, cilado qoftë ajo. Rastet e alergjisë janë shtuar me ritme të shpejta në 20 vjetët e fundit.

Simptomat e alergjisë që nuk duhen nënvlerësuar:

– Teshtimat e shpeshta,
– Sy të skuqur,
– Hundë të rrjedhshme,
– Hundë të bllokuara,
– Njolla në lëkurë,
– Vështirësi në frymëmarrje,
– Kollë e lehtë,
– Ftohje e menjëhershme,
– Diarre,
– Tensioni i gjakut.