Gjermania kërkon në Kosovë ekspertë të IT-së, inxhinierisë dhe bujqësisë

Përveç infermierëve edhe një numër i madh i punëtorëve nga sektorë tjerë priten të nisen drejt Gjermanisë nga Kosova

(AP Photo/Matthias Schrader)

Gjermania është duke kërkuar një numër të madh të punëtorëve që të punojnë në mënyrë legale. Raportohet se 40 mijë infermierë janë duke i kërkuar, kurse qindra kanë shkuar nga Kosova dhe një numër i madh është i interesuar të shkojë për të punuar në Gjermani, raporton “KTV”.

Vlerësohet se rreth 500 infermierë nga Kosova do të nisen drejt Gjermanisë, kurse numri i të interesuarve është shumë i madh, përcjell albinfo.ch.

Pas pak kohësh do të nisin edhe trajnimin dhe dërgimin në punë në shtetin gjerman të interesuarve edhe nga disa sektorë të tjerë, ku shteti gjerman i ka kërkuar. Derisa numri i kompanive që po merren me trajnimet dhe dërgimin e të rinjve profesionalë ka shënuar rritje, Ministria e Punës dhe e Mirëqenies Sociale tek tash ka arritur të funksionalizojë Agjencinë e Punësimit.

Ministri i Punës dhe Mirëqenies Sociale, Arban Abrashi është shprehur se janë mbi 14 mijë vende të punës dhe do të nisin trajnimet në fusha të shumta. Ekspertë të IT-së, inxhinierisë dhe bujqësisë, janë disa nga sektorët ku kërkohen më shumë punëtorë.