Lunaçek mbështet fillimin e dialogut për vizat

Raportuesja për Kosovën në Parlamentin Evropian, Ulrike Lunacek, mbështet fillimin e dialogut për liberalizimin e vizave

Pas takimit me ministrin e Brendshëm, Bajram Rexhepi, ku u diskutua për të arriturat në plotësimin e kushteve për liberalizimin e vizave, Lunacek vlerësoi përkushtimin dhe rezultatet e arritura nga institucionet e Kosovës, duke kërkuar që të vazhdohet me këtë angazhim edhe në javët dhe muajt e ardhshëm.

Në këtë takim u diskutua edhe për situatën e sigurisë në Kosovë, me fokus në pjesën veriore të vendit, me ç’rast të dy bashkëbiseduesit u pajtuan se rendi dhe ligji duhet të vendoset edhe në atë pjesë të vendit, për t’i hapur perspektivë zhvillimit edhe të asaj pjese të vendit.

Ministri Rexhepi falënderoi eurodeputeten Lunacek për angazhimin e deritanishëm dhe e informoi për progresin e arritur dhe angazhimet që ka ndërmarrë Ministria e Punëve të Brendshme për fillimin e dialogut për viza me Bashkimin Evropian gjatë këtij viti.