Autostrada ka dhjetëfishuar eksportet e Shqipërisë në Kosovë

Ndërtimi i autostradës Durrës-Kukës-Morin, ka dhjetëfishuar eksportet e Shqipërisë në Kosovë, krahasuar me vitin 2008, periudhë në të cilën nuk ka qenë e përfunduar autostrada, shkruan “Koha Ditore”.

Ndërkohë që ndërtimi i autostradës ka trefishuar edhe transitet për në Kosovë nga Shqipëria, kryesisht përmes portit të Durrësit.

Shtimi i eksporteve dhe transiteve ka nxjerrë si domosdoshmëri ngritjen e kapaciteteve të reja infrastrukturore për t’iu përgjigjur realiteteve të reja të krijuara.

Zyrtarët e Doganës së Morinit e lidhin faktin e shtimit të ndjeshëm të numrit të eksporteve, por edhe të transitin të mallrave për në Kosovë përmes Shqipërisë, me ndërtimin e autostradës Durrës-Morin.

Sipas këtyre zyrtarëve, dhjetëfishimi i eksporteve ka nxjerrë si domosdoshmëri ndërtimin e një terminali të ri në Morin, pasi ai ekzistues nuk mjafton për më shumë se 10 maune.