BB-ja skeptike për “Kosovën e Re”

Banka Botërore vështirë se do të hyjë si garantues për Qeverinë e Kosovës në projektin e Kosovës së Re.

Kështu, projekti në të cilin Qeveria e Kosovës ka varur shpresat për t’i dhënë fund territ energjetik duket se nuk do të fillojë në një të ardhme të afërt.

Shefi i Zyrës së Bankës Botërore në Kosovë, Jan-Peter Olters, në një intervistë për Gazetën Express, shpjegon se vendet anëtare të kësaj organizate po shikojnë kostot dhe benefitet e këtij projekti për të dhënë pëlqimin për të qenë garantues të investimeve në termocentralin e ri.

Sipas tij, duhet të shikohen fillimisht efektet nga një vendim i tillë. Sidomos, të balancohet ndikimi i çmimit të energjisë te qytetarët, ndikimi në ndotjen e ambientit nga emetimi i dyoksidit të karbonit si dhe ngarkesa buxhetore për këtë projekt.

“Debati është bërë në njëfarë mënyre pjesë e një diskutimi global lidhur me ndryshimet klimatike, emetimin e CO2-shit dhe rivlerësimin e kostos dhe benefiteve të prodhimit të energjisë. Në këtë pikë ne nuk kemi marrë ende vendim për të garantuar investimet në këtë projekt”, ka deklaruar Olters.