Pas shqiptarëve, edhe boshnjakët me deklaratë për njohjen e vlerave zvicerane

Deklarata është nënshkruar në kryeqytetin e Bosnjës, në Sarajevë, në praninë e kryetarit të Bashkësisë së Kishave Ungjillore të Zvicrës (Kisha reformatore)

Myslimanët e Bosnjës që jetojnë në Zvicër kanë nënshkruar të premten e javës që shkoi një deklaratë për laicitet, njohje të vlerave të sistemit juridik zviceran dhe të vlerave zvicerane në përgjithësi, shkruan albinfo.ch, duke iu referuar srf.ch.

Deklarata është nënshkruar në kryeqytetin e Bosnjës, në Sarajevë, në praninë e Gottfried Locher, kryetarit të Bashkësisë së Kishave Ungjillore të Zvicrës (Kisha reformatore), i cili njëherësh është edhe kryetar i Këshillit të Religjioneve të Zvicrës. Locher e ka bërë nënshkrimin bashkë me kryemyftiun e Bosnjës, Husein Kavazovic.

Në deklaratë thuhet në mënyrë eksplicite se të gjithë njerëzit janë të lirë të përcaktohen për religjionin e tyre, transmeton albinfo.ch. Po ashtu nënshkruesit dënojnë terrorizmin e motivuar nga religjioni.

Kjo deklaratë vjen rreth dy muaj pas asaj të nënshkruar nga besimtarët myslimanë të komunitetit shqiptar. Në mars të këtij viti, krerët e organizatave që udhëheqin besimtarët myslimanë shqiptarë, kishin nënshkruar në Bernë një deklaratë mbi njohjen e vlerave zvicerane, laicitetit dhe shtetit juridik. Po ashtu ata me anë të deklaratës në fjalë ishin distancuar nga shfrytëzimi i religjionit për qëllime politike destruktive.