Bazeli ndalon për shkaqe sigurie shënimin e 120 vjetorit të cionizmit

Koha e mbetur deri në fund të muajit gusht nuk është e mjaftueshme që policia dhe autoritetet tjera të sigurisë të marrin të gjitha masat e nevojshme që garantojnë siguri

Solemniteti me rastin e shënimit të jubileut, 120 vjetorit të kongresit të parë cionist në botë është anuluar. Ai pritej të mbahej nga fundi i muajit gusht në Bazel, ku dhe është mbajtur kongresi i përmendur në vitin 1897, shkruan srf.ch. Qeveria e Kantonit të Bazelit, ka njoftuar të premten opinionin se mbajtja e këtij manifestimi duhet të ndalohet për shkak të shqetësimeve mbi sigurinë.

Koha e mbetur deri në fund të muajit gusht nuk është e mjaftueshme që policia dhe autoritetet tjera të sigurisë të marrin të gjitha masat e nevojshme që garantojnë siguri, transmeton albinfo.ch. Në rast se organizatorët duan që në një moment kohor të mëvonshëm të realizojnë një manifestim të tillë në Bazel, Qeveria e Kantonit është e gatshme për të ofruar bashkëpunim.

Kongresi i parë cionist është mbajtur në vitin 1897 në Bazel të Zvicrës. Ai konsiderohet sot si një gur në themelin e lëvizjes së njohur cioniste dhe si hap i parë i cili ka çuar në themelimin e shtetit të Izraelit, në vitin 1948.

Në vitin 1997 në Bazel ishte mbajtur manifestimi për shënimin e 100 vjetorit të mbajtjes së kongresit të përmendur.