Banka Nacionale e Zvicrës, me 33.7 miliardë franga fitim

Pjesa dërmuese e fitimit i referohet tremujorit të fundit, pra periudhës qershor-shtator, kur fitimi ka qenë plot 32.5 miliardë franga

KEYSTONE

Banka Nacionale e Zvicrës (SNB), gjatë nëntë muajve të deritashëm të vitit ka realizuar një fitim prej 33.7 miliardë frangash. Siç bën të ditur vetë SNB në një njoftim, pjesa dërmuese e fitimit i referohet tremujorit të fundit, pra periudhës qershor-shtator, kur fitimi ka qenë plot 32.5 miliardë franga, shkruan srf.ch. Ndërsa meritat për këtë periudhë fitimesh u takojnë në radhë të parë dobësimit relativ të frangut dhe ngritjes së çmimeve të arit e të aksioneve.

Ekonomistët e bankës më të madhe të Zvicrës, UBS tashmë flasin për një “radhitje rrethanash fatlume”, transmeton albinfo.ch. Kjo për faktin se rritja e çmimit të arit dhe dobësimi i frangut në të njëjtën kohë, është diçka që nuk ndodh shpesh.