Lluka takon investitorë gjermanë, fton ata të investojnë në Kosovë

Ministri i Zhvillimit Ekonomik prezantoi planet e tij për rritje të transparencës në proceset e marrjeve të licencave për energji të ripërtëritshme, duke prezantuar konceptin në formë të ankandeve të hapura

Foto Ilustrim

Ministri i Zhvillimit Ekonomik, Valdrin Lluka, ka pritur në një takim një delegacion të investitorëve nga Gjermania, kryesuar nga Hans Jurgen Muller, kryetar i Shoqatës Ekonomike Gjermano-Shqiptare, i shoqëruar nga ambasadori i Kosovës në Berlin, Skënder Xhakaliu.

Lluka ka prezantuar para investitorëve mundësitë e investimeve në Kosovë, duke u fokusuar në katër fusha: energjinë, energjinë e ripërtëritshme dhe efiçiencën e energjisë, minierat, me fokus të veçantë Trepçën, sektorin e TIK-ut, me fokus infrastrukturën si dhe proceset e ndërmarrjeve publike në vend.

Gjithashtu, ministri i Zhvillimit Ekonomik prezantoi planet e tij për rritje të transparencës në proceset e marrjeve të licencave për energji të ripërtëritshme, duke prezantuar konceptin në formë të ankandeve të hapura, ku investitorët marrin pjesë në formë transparente.

Kreu i Odës Gjermano-Shqiptare Hans Jurgen Muller, ka përgëzuar ministrin Lluka për angazhimet e tij në zhvillimin ekonomik të Kosovës, duke vlerësuar transparencën që po promovon.