“EU observer”: Hashim Thaçi e Daut Haradinaj pritet të akuzohen nga Specialja

Mediet e huaja po vazhdojnë të merren me zhvillimet që po ndodhin rreth Gjykatës Speciale në Kosovë. “EU Observer”, përmend Hashim Thaçi e Daut Haradinajn si të akuzuarit e mundshëm nga Gjykata Speciale

Presidenti i Kosovës, Hashim Thaçi dhe deputeti Daut Haradinaj janë përmendur si dy ish guerilët e UÇK-së të cilët mund të ndiqen penalisht nga Gjykata Speciale në Kosovë. “EU Observer”, një medium i pavarur që mbulon zhvillimet brenda Bashkimit Evropian, i ka dhënë hapësirë deklaratës së shteteve të QUINT-it, që u publikua mbrëmë si ultimatum kundër shfuqizimit të Gjykatës Speciale, ndërsa në qendër ka dy ish udhëheqësit e luftës në Kosovë.

“Daut Haradinaj e Hashim Thaçi, të dy ish-komandantë të UÇK-së pritet të ballafaqohen me raste në Institucionin Gjyqësor të Zhvendosur të Specializuar të Kosovës” shkruan EU Observer, ku theksohet se me kundërshtimet që po i bëhen Gjykatës po rrezikohet e ardhmja evropiane e Kosovës.

Më pas në shkrim thuhet se BE-ja e ka krijuar Gjykatën Speciale për t’i trajtuar akuzat ndaj zyrtarëve të lartë të UÇK-së që kanë qenë të involvuar në trafikim organesh të të burgosurve serbë në luftën e Kosovës me Serbinë gjatë vitit 1998 dhe 1999, shkruan sot gazeta Express.

Eu Observer ka transmetuar deklaratën e kryeministrit Ramush Haradinaj, gjatë vizitës së djeshme në Gjakovë, ku tha se ka qenë kundër Gjykatës derisa ka qenë në opozitë dhe se është kundër edhe tani. “Vëllai i tij, Daut Haradinaj, një deputet, ka shkuar edhe më tej duke thënë javën e kaluar se arrestimet e para të Gjykatës Speciale do ta aktivizojnë ish-guerilen e UÇK-së”, shkruan EU Observer.

Po ashtu, aty përmendet edhe presidenti Hashim Thaçi, si pjesë e kësaj përpjekjeje  dhe vendimi i tij për të falur vëllezërit Kiqina e Ramadani. Hashim Thaçi me urdhrin për falje ka amnistuar katër të dënuar për vepra penale, në mesin e tyre tre i përkasin “Rastin Hajra” ku tre të dënuarve në këtë rast i janë falur 45 vjet burg.