Qeveria ende s’e di kush është fajtori kryesor i ndotjes së ajrit

Ministrja e Mjedisit, Albena Reshitaj, ka thënë se ende nuk është gjetur kush është fajtori kryesor për ndotjen e ajrit në vend. Ajo ka thënë në Komisionin për Bujqësi, Pylltari, Zhvillim Rural, Mjedis e Planifikim Hapësinor se ka kërkuar të bëhen vlerësime të tilla, por se ende s’ka marrë përgjigje të qartë.

“E mira do të ishte një plan që të mos lejojmë përdorimin në mënyrë ilegale të thëngjillit për ngrohje. T’i marrim masat që vitin e ardhshëm, të mos kemi këso problemesh, por të lejohet vetëm eksportimi i tij, mirëpo jo edhe shitja te qytetarët”, ka thënë ajo.

Ilir Morina, kryeshef në Agjencinë për Mbrojtjen e Mjedisit, ka thënë se ndotja është rezultat i situatës meteorologjike.

Ndërkaq, sipas drejtorit të KEK-ut, Arben Gjukaj, ndotësit kryesor janë deponitë e hapura, duke shtuar se ndotësi momental mbetet vetëm Kosova B. Drejtori i Institutit Kombëtar të Shëndetësisë Publike, Naser Ramadani, ka thënë se kanë kërkuar qysh nga 2009-ta që të hiqen veturat e vjetra që hyjnë në qytet.