KQZ: PDK-ja e Hashim Thaçit prin me 33.5 për qind

Partia Demokratike e Kosovës prin me 33.5 për qind të votave, sipas rezultateve preliminare të Komisionit Qendror të Zgjedhjeve (KQZ). Ky mekanizëm zgjedhor publikoi në orët e vona të mbrëmjes rezultatet e para preliminare të zgjedhjeve parlamentare të së dielës.

Sipas rezultateve preliminare, të cilat i kumtoi kryetarja e KQZ-së, Valdete Daka, PDK-ja ka fituar 33.5 për qind; LDK-ja 23.6 për qind; Lëvizja Vetëvendosje 12.2 për qind; AAK-ja 10.8 për qind; AKR-ja 7.1 për qind; LDD-ja 3.3 për qind dhe Fryma e Re 2.2 për qind.

Daka tha se këto rezultate dalin në bazë të votave të numëruara në gati 99 për qind të vendvotimeve. Mbeten të panumëruara votat nga 23 vendvotime, të cilat  nuk janë të futur në rezultatin përfundimtar, ku 10 janë nga Prishtina, ndërsa 13 prej tyre nga komunat e tjera.

Me gjithë raportimet  e vëzhguesve për parregullsi dhe të disa partive politike që janë ankuar për manipulim të votave, në rezultatin preliminar të KQZ-së janë përfshirë edhe votat nga të të gjitha komunat, pra edhe nga Skenderaj dhe Drenasi.

Komisioni Qendror i Zgjedhjeve, sipas kryetares Daka, nuk mban përgjegjësi për parregullsitë në terren dhe se me ankesat e bëra nga partitë politike merret Paneli Zgjedhor për Ankesa dhe Parashtresa, raportojnë mediat kosovare.