Nxënësit e shkollës shqipe vizituan bustin e Skënderbeut

Këshilli i prindërve, bashkë me mësuesen e nxënësit e shkollës së mësimit në gjuhën shqipe ,,Naim Frashëri“ në Rüti,Ostermundigen dhe Breitfeld në Bernë, organizoi shëtitje njëditëshe në Gjenevë.

Qëllimi i kësaj vizite ishte që nxënësit të njihen së afërmi me bustin e Skënderbeut që kishin mësuar në orët e historisë, si dhe për të nderuar datat historike shumë të rëndësishme për shqiptarët.

Nga Berna u nisëm në mëngjes. Nxënësit bashkë me prindërit pritnin me padurim shkuarjen në Gjenevë. Rrugën na e shkurtuan nxënësit me këngët e tyre atdhetare, sa të dukej sikur jemi nisur për të vizituar Skënderbeun në Krujë, apo Ismail Qemalin në Vlorë ose Adem Jasharin në Prekaz.

Pas një pushimi të shkurtër në Lozanë, mbërijmë në Gjenevë. Ndalemi afër limanit të mbushur me anije e varka, si dhe fontanës që e zbukuron edhe më shumë liqenin e Gjenevës për çdo vizitor.

Të radhitur dy nga dy, nxënësit u nisën në këmbë rreth liqenit, të përcjellë nga prindërit e mësuasja e tyre me një ecje ritmike për të shkuar te parku ku është vendosur busti i Skënderbeut.

Vizitorët e vegjël duken sikur imagjinojnë Skënderbeun të gjallë e madhështor, ashtu si e përshkruajnë librat e historisë kombëtare, e që kanë dëgjuar nga prindërit e tyre. Kjo të bën të mendosh e të veprosh, si thotë një fjalë e urtë popullore:,,Çka do të mbjellësh, atë do të korrësh“.

Momenti kur arritëm afër bustit, të bënte KRENAR SE JE SHQIPTAR. Skënderbeu dukej shumë madhështor, ndoshta pse atë ditë ishte 10 Qershori i 134-vjetorit të Lidhjes së Prizrenit, apo sepse ishte 13-vjetori i Çlirimit të Kosovës!

Në fytyrat e nxënësve dhe  të prindërve dukej një çmallje, pasi malli për Atdheun ia kalon çdo malli tjetër.

Më pas, vijuam shëtitjen në kopshtin botanik e zoologjik, ku nxënësit panë bimë, kafshë e shpezë të ndryshme, duke nxituar që sa më shumë të shohin e të fotografojnë.Kënaqësi e veçantë ishte kur mbërrijtëm para Selisë së Kombeve të Bashkuara. Nxënësit me një krenari të veçantë, të radhitur mes shumë flamujsh të tjerë panë Flamurin Kombëtar,që atë ditë dukej edhe më i bukur se herët e tjera.

Këtë vizitë do ta kujtojmë si një nga kujtimet më të mira të nxënësve të shkollës së mësimit plotësues në gjuhës shqipe.